حماتي وابني حكايات زهرة حصري

في فرح أخت جوزي، حماتي زقت ابني زياد اللي عنده خمس سنين عشان اخد قطعة كب كيك، في الوقت اللي جوزي جالي ووشه في الأرض يوشوشني ويقولي نتكلم بعدين يا سما.. بلاش فضايح! بس مكانوش يتخيلوا أبداً إن ابني الصغير سمع محادثه هيقلب بيها الفرح رأساً على عقب قبل ما الليلة تخلص!

الكب كيك ده للمعازيم المهمين مش للعيال الجعانة!
حماتي سعاد صرخت بالكلمتين دول قبل ما تزق ابني زياد بعنف في وسط القاعة.
الصوت قطم صوت الأغاني والدي جي اللي شغال.
زياد اختل توازنه، وقع على ركبه على أرضية القاعة الرخام المتلمعة، والكب كيك الفانيليا اتدحرجت واتداست تحت جزمته الصغيرة.
للحظة، كل حاجة فضلت شغالة زي ما هي ولا كأن حاجة حصلت..كاسات الشربات، النور المبهوق، والناس بتضحك للمصورين.
بس جوايا؟ في حاجة اتكسرت ومستحيل تتصلح تاني.
جريت عليه.
خد ابني كان أحمر جمر، وعينيه مليانة دموع، والفيونكة الصغيرة بتاعته معوجة على قميصه الأبيض.
يا ماما، البنت هي اللي قالتلي خذها.. قالها وهو بيترعش من العياط.
مسحت وشه بالراحة وأنا بحاول أداري دموعي قدام الناس.
بصيت لحماتي، الحجة سعاد.
عينها حجر، ولا اتهزت!
عدلت عقد اللولي بتاعها وقالت ببرود كان لازم حد يعلمه الأدب والدلع اللي أنتي عودتيه عليه مينفعش انهارده….سايبة الولد ياكل زي الجعانين!
الفرح كان معمول في دار مناسبات وفندق فخم جداً على طريق مصر إسكندرية الصحراوي. ورد وارد من برة على
كل طاولة، وبوفيه حلويات وطورطة 5 أدوار تفتح النفس، تكفي بلد. كاميرات في كل زاوية، وفيديو مصور محترف. أخت

جوزي نورهان كانت بتتجوز عمر، ابن راجل أعمال معروف أوي في الإسكندرية.
ولشهور، كانت حماتي نازلة فخر قدام القرايب انها هي اللي دافعة كل مليم في الفرح
بنتي لازم تبتدئ حياتها زي الملكات!
اللي محدش كان يعرفه.. إن ال 200ألف جنيه من مصاريف الفرح ده اتسحبوا دم قلب من تحويشتي الشخصية!
أنا اسمي سما، شغال محاسبة، بقالي 5 سنين بشيل القرش على القرش.. المكافأة، العيدية، فروق الضرائب، وأي قرش زيادة ينزللي، عشان نجمع مقدم شقة صغيرة. مش قصر، ولا فيلا.. مجرد شقة 3 أوض ولمة دافية أنا وجوزي ماجد وابننا زياد، نخلص بيها من تحكمات الحجة سعاد وعيشتنا معاها في بيتها.
أصل العيشة تحت سقفها كانت عبارة عن موشح يومي إني مش من مستواهم، وإن أهلي ناس على قدهم، وإن زياد متربي غلط ومتدلع ، وإن ماجد لازم يفضل تحت رجليها قبل ما يفكر في مراته!
قبل الفرح بشهرين، حماتي جمعتنا في الصالون وقالت
انا مزنوقة في فلوس ومحتاجه حواللي 200 ألف جنيه فكة كده عشان القاعة والورد والفوتوسيشن لزوم فرح نورهان….. وماجد أخوها، والعيلة لازم تشيل بعضها!
أنا اتسمرت مكاني بس الفلوس دي عشان مقدم الشقة!
ماجد مسك إيدي من تحت الترابيزة وقال بصوت واطي عشان خاطري يا سما، المرة دي بس.. وحقك عليا أول ما الفرح يخلص هنرجعهم، أمي مش هتأكل علينا حقنا.
وافق وحولت الفلوس من غير عقد، ولا وصل أمانة، ولا أي إيصال يضمن حقنا. عملتها عشان خاطر ماجد، ولأني كنت لسه عبيطة وبصدق إن في حاجة اسمها دين أصول وعيلة.
ومن ساعتها، حماتي رمت كل قرف الفرح على دماغي كلمي الفندق، راجعي الفواتير، استلمي الورد، ظبطي أماكن المعازيم.. في حين إن نورهان كانت تقضي اليوم تتفرج على فساتين وتعيط عشان لون المناديل مش لايق مع جزمة العريس!
يوم الفرح، وصلت أنا وزياد من الساعة 8 الصبح. الولد ماكلش غير نص لقمة جبنة. كل شوية يقولي جعان يا ماما، وكل ما أروح أجيبله حاجة تأكله، تطلعلي حماتي بأمر جديد
يا سما، شوفي طاولات أهل العريس!
يا سما، اتكلمي مع بتوع الصوت!
يا سما، قولي لل DJ يغير الأغاني البلدي دي!
لحد ما بنت صغيرة شغاله في السيرفيس شافت زياد قاعد لوحده وعينيه متلقحة من التعب، راحت مدياله كب كيك فايضة من بوفيه الأطفال.
وعشان أخد حتة كيكة.. حماتي اتجننت عليه وزقته قدام الناس!
ماجد وصل وأنا لسه حضنة زياد وبطهرله ركبته.
قلتله وأنا كلي أمل يتكلم أمك ضربت ابنك ورجله اتعورت عشان أكل كب كيك!
ماجد بص لخد الولد الأحمر، وبعدين بص لأمه، وبعدين للمعازيم اللي ابتدوا يبصوا علينا.
وطى عليّ ومسك دراعي وقال سما. عشان خاطري، النهاردة فرح أختي مش عايزين فضايح قدام أهل العريس.. نتكلم بعدين!
زياد رفع وشه المليان دموع وقال بصوت يقطع القلب
أنا آسف يا بابا.. مش هاكل تاني خالص.
ماجد نزل رأسه
وما نطقش كلمة.
اللحظة دي وجعتني أكتر من أي حاجة.. أكتر من الزقة، وأكتر من الإهانة، وأكتر من الفلوس اللي راحت.
إن ابني الصغير يتأسف إنه كان جعان، وأبوه واقف زي الصنم!
شيلت زياد ودخلت بيه في الطرقة بتاعة الخدامين والعمال، ورا كراتين الشربات والمفارش. قعدت أطهر ركبته المحروقة من الوقعة، وطلعت فواتير القاعة من شنطتي عشان كنت ناوية أواجه حماتي بالفلوس بعد ما المهزلة دي تخلص.