سجدة التلاوة لاصحاب الاعذار

2

سجدة التلاوة لاصحاب الاعذار

مين اللي قالكم إن رمضان بيحب اللمة ؟! سألتوه وهو اللي أكدلكم؟!

ياخويا أومال ليه النبي صلى الله عليه وسلم كان بيعتزل الناس طول شهر رمضان ويفضل قاعد لوحده في غار حراء يتعبد؟! وبعد البعثة برضو ماعمرناش سمعنا إنه عزم ولاده عالفطار ولمهم حواليه طالما اللمة حلوة في رمضان !!!! طب حتى السيدة فاطمة طيب وجوزها اللي هو ابن عمه !!!! طب صاحبه وحبيبه وحماه أبو بكر أو صاحبه وحماه عمر بن الخطاب أو حواريه الزبير أو جوز بناته الاتنين عثمان بن عفان !!!! طب يلم حواليه أي حد طيب !!!! أبداً  إيهي ؟؟ طب واللمة ورمضان اللي بيحب اللمة ؟!!

ده على العكس بقى أقوى عبادة في رمضان هي الاعتكاف والانقطاع للعبادة والانعزال !!!!!

ولا هو رمضان ماكنش حابب اللمة زمان وحبها على كبر ولا إيه ؟

ربنا بيقول ﴿ يَا أَيُّهَا الَّذِينَ آمَنُوا كُتِبَ عَلَيْكُمُ الصِّيَامُ كَمَا كُتِبَ عَلَى الَّذِينَ مِنْ قَبْلِكُمْ لَعَلَّكُمْ تَتَّقُونَ ﴾ بيقول لعلكم إيه لعلكم تتقون مش لعلكم تأكلون أو لعلكم تتجمعون أو لعلكم تتلمون !!!!

التقوى دي مش هتحصل غير بالاجتهاد في العبادة وتجميع أكبر قدر من الحسنات إنما نيجي في موسم الحسنات وننشغل بالأكل والعزومات واللمة يبقى هنجيبها منين التقوى؟!

الوقت اللي هتقضيه في المطبخ بتعملي أكل العزومة اقرأي فيه جزئين ولا تلاتة قرآن وجمعي حسنات أكتر … الوقت اللي هتقعديه مع الضيوف تحكوا صلي فيه ركعتين وزودي حسناتك … الوقت اللي هتنفقه عشان تروح لناس تفطر عندهم أو تستقبلهم يفطروا عندك نام فيهم شوية عشان تقدر تصلي التهجد …. الفلوس اللي هتصرفوها على العزايم طلعوها صدقات وخدوا حسنات انشطارية أكتر بكتير

وإوعى حد يقول ما إحنا بنعمل كدة طبيعي في رمضان وبنلاقي وقت وفلوس زيادة نعزم ونجمع الحبايب …. لا زودوا … بتقرأوا جزئين ولسة عندكم وقت خليهم أربعة … خليهم ستة واختموا خمس مرات في رمضان … بتختموا طبيعي خمس مرات يبقى اختموا عشر ختمات بتطلعوا ١٠٠٠ جنيه صدقات ومعاكم زيادة طلعوا ٥٠٠٠ خليكوا تجار شاطرين وصيادين ماهرين ماتبقوش خيبانين وتصرفوا جهدكم وفلوسكم في اتجاه غلط وفي الآخر تلاقوا نفسكم طلعتم من رمضان من غير ماتعملوا حاجة … ماحدش عارف هييجي عليه رمضان تاني ولا ده آخر رمضان !!!

ناس كتير من حبايبنا تحت التراب دلوقتي يتمنوا يحضروا ولو رمضان واحد تاني يلموا فيه شوية حسنات بس هيهات  إحنا ممكن جداً نكون منهم السنة الجاية ومانلحقش رمضان تاني … إوعوا تفتكروا إنكم عشان دعيتوا بالدعاء الغير جائز بتاع ( اللهم بلغنا رمضان غير فاقدين ولا مفقودين ) إنكوا ضمنتوا تعيشوا لرمضان  كتير من اللي ماتوا كانوا بيدعوا برضو وأديهم فُقِدوا فمافيش ضمان